ആഗോള സൂചനകൾ വിപണിയെ നയിക്കും: സിംഗപ്പൂർ ഇന്നും ഇടിവിൽ തുടക്കം

കൊച്ചി: ആഗോള സൂചനകൾ, പ്രത്യേകിച്ച് യുഎസ് ആസ്ഥാനമായുള്ള സിലിക്കൺ വാലി ബാങ്കിന്റെ തകർച്ച, പണപ്പെരുപ്പ പ്രവണതകൾ, വിദേശ ഫണ്ടുകളുടെ ഒഴുക്ക് എന്നിവയായിരിക്കും ഈ ആഴ്ച നിക്ഷേപകർ നിരീക്ഷിക്കാൻ സാധ്യത. കൂടാതെ ഇന്ന് പുറത്തു വരുന്ന ഫെബ്രുവരിയിലെ ഉപഭോക്തൃ വിലക്കയറ്റ ഡാറ്റ നിക്ഷേപകർ കാത്തിരിക്കുകയാണ്.

"മോശം ആഗോള സൂചകങ്ങളാണ് ഇന്ത്യൻ ഇക്വിറ്റി വിപണിയിലെ ദൗർബല്യത്തിന് പ്രധാന സംഭാവന നൽകിയത്, അടുത്ത ആഴ്ചയും അവ ഗണ്യമായി തുടരു"മെന്ന് സ്വസ്തിക ഇൻവെസ്റ്റ്മാർട്ട് ലിമിറ്റഡിന്റെ ഗവേഷണ വിഭാഗം മേധാവി സന്തോഷ് മീണ പറഞ്ഞു.

സെൻട്രൽ ബാങ്കുകൾ പണപ്പെരുപ്പം നേരിടാൻ പലിശ നിരക്ക് ഉയർത്തുന്നതിനിടയിൽ, സാങ്കേതിക മേഖലയിലെ സ്റ്റാർട്ടപ്പുകളുടെ പ്രധാന ധനസഹായ സ്രോതസ്സായ സിലിക്കൺ വാലി ബാങ്കിന്റെ വീഴ്ച ആഗോള സാമ്പത്തിക വ്യവസ്ഥയുടെ മൊത്തത്തിലുള്ള നിലനിൽപ്പിനെക്കുറിച്ചുള്ള ആശങ്കകൾക്ക് കാരണമായി.

“യുഎസ് ഫെഡറൽ റിസർവ് മേധാവിയുടെ അഭിപ്രായത്തെത്തുടർന്ന് ആഗോള വിപണി വീണ്ടും അനിശ്ചിതത്വത്തിലേക്ക് വീണു, ഇത് ദീർഘകാലവും വേഗത്തിലുള്ളതുമായ നിരക്ക് വർദ്ധനയുടെ സാധ്യതയെ സൂചിപ്പിക്കുന്നു,” ജിയോജിത് ഫിനാൻഷ്യൽ സർവീസസ് ഗവേഷണ വിഭാഗം മേധാവി വിനോദ് നായർ പറഞ്ഞു.

ചില ബ്ലോക്ക് ഡീലുകൾ ഒഴിവാക്കിയാൽ, വിദേശ സ്ഥാപന നിക്ഷേപകർ (എഫ്‌ഐഐകൾ) ഇപ്പോഴും വിൽപ്പന രീതിയിലായതിനാൽ ചൈനീസ് ഐഐപി (വ്യാവസായിക സൂചിക ഉൽപ്പാദനം) നമ്പറുകളും സ്ഥാപന ഫണ്ടുകളുടെ ഒഴുക്കും നിർണായകമാകുമെന്ന് മീണ പറയുന്നു.

യുഎസിൽ വെള്ളിയാഴ്ച പുറത്തുവന്ന പ്രതീക്ഷിച്ചതിലും ഉയർന്ന തൊഴിലില്ലായ്മ ക്ലെയിമുകൾ ഫെഡറൽ റിസർവ് പലിശ നിരക്ക് വർദ്ധനയിൽ കൂടുതൽ കർശനമാക്കുന്നതിനെക്കുറിച്ചുള്ള ചില ആശങ്കകൾ ലഘൂകരിക്കാൻ സഹായിച്ചതായും വിനോദ് നായർ അഭിപ്രായപ്പെട്ടു.

പണപ്പെരുപ്പം ഈ വർഷം കുറയുമെന്ന് പ്രതീക്ഷിക്കുന്നതായി ആർബിഐ മോണിറ്ററി പോളിസി കമ്മിറ്റി (എംപിസി) അംഗം ആഷിമ ഗോയൽ ഞായറാഴ്ച പറഞ്ഞു, പണപ്പെരുപ്പം കുറയ്ക്കണമെന്ന് ലക്ഷ്യമിട്ടുള്ള ഭരണകൂടത്തിന്റെ സപ്ലൈ-സൈഡ് നടപടിയാണ് വിലക്കയറ്റത്തിന്റെ തോത് മറ്റ് രാജ്യങ്ങളുടെതിനേക്കാൾ കുറയ്ക്കാൻ ഇടയാക്കിയത് എന്നവർ ചൂണ്ടിക്കാണിച്ചു.

വെള്ളിയാഴ്ച വിപണി അവസാനിക്കുമ്പോൾ സെൻസെക്‌സ് 671.15 പോയിന്റ് അഥവാ 1.12 ശതമാനം ഇടിഞ്ഞ് 59,135.13 എന്ന നിലയിലാണ് ക്ലോസ് ചെയ്തത്. നിഫ്റ്റി 176.70 പോയിൻറ് അഥവാ 1 ശതമാനം ഇടിഞ്ഞ് 17,412.90 ൽ ക്ലോസ് ചെയ്തു.

എഫ് ഐഐ/ഡിഐഐ

എൻഎസ്ഇ കണക്കുകൾ പ്രകാരം വെള്ളിയാഴ്ച (മാർച്ച് 10) ആഭ്യന്തര നിക്ഷേപ സ്ഥാപനങ്ങൾ 1,350.13 കോടി രൂപയ്ക്ക് ഓഹരികൾ അധികം വാങ്ങിയപ്പോൾ വിദേശ നിക്ഷേപ സ്ഥാപനങ്ങൾ -2,061.47 കോടി രൂപയ്ക്ക് അധിക വില്പനക്കാരായി.

കേരള കമ്പനികൾ

കേരളം ആസ്ഥാനമായുള്ള കമ്പനികളിൽ ആസ്റ്റർ ഡി എം, ജിയോജിത്ത് ഫൈനാൻഷ്യൽ, കിംസ്, കിറ്റെക്സ്, സൗത്ത് ഇന്ത്യൻ ബാങ്ക്, വി ഗാർഡ് എന്നിവ ഒഴിച്ച് ബാക്കിയെല്ലാം വെള്ളിയാഴ്ച ചുവപ്പിലാണവസാനിച്ചത്.

റിയാൽറ്റി കമ്പനികളിൽ പി എൻ സി ഇൻഫ്രയും പുറവങ്കരയും ഉയർന്നപ്പോൾ ശോഭ നഷ്ടത്തിലായി.

ആഗോള വിപണി

ഏഷ്യൻ വിപണികൾ ഇന്ന് രാവിലെ നഷ്ടത്തിലാണ് ആരംഭിച്ചിട്ടുള്ളത്. സിംഗപ്പൂർ എസ ജി എക്സ് നിഫ്റ്റി (-77.00), ജപ്പാൻ നിക്കേ (-485.03), ചൈന ഷാങ്ങ്ഹായ് (-46.01), തായ്‌വാൻ വെയ്റ്റഡ് (-96.74), ദക്ഷിണ കൊറിയ കോസ്‌പി (-21.87), ഹോങ്കോംഗ് ഹാങ്ങ് സെങ് (-605.82) ജക്കാർത്ത കോമ്പോസിറ്റ് (-34.50) എന്നിവ ചുവപ്പിലാണ് തുടക്കം.

വെള്ളിയാഴ്ച്ച യുഎസ് സൂചികകൾ കുത്തനെ ഇടിഞ്ഞു:  ഡൗ ജോൺസ് ഇൻഡസ്‌ട്രിയൽ -345.22 പോയിന്റും, എസ് ആൻഡ് പി -56.73 പോയിന്റും, നസ്‌ഡേക് -199.47 പോയിന്റും താഴ്ചയിലേക്ക് കൂപ്പുകുത്തി.

യൂറോപ്പിലും സ്ഥിതി വ്യത്യസ്തമായിരുന്നില്ല. ലണ്ടൻ ഫുട്‍സീയും (-131.63), പാരീസ് യുറോനെക്സ്റ്റും (-95.21), ഫ്രാങ്ക്ഫർട് ഡി എ എക്‌സും (-205.24) ചുവപ്പിൽ തന്നെ അവസാനിച്ചു.

ശ്രദ്ധിക്കേണ്ട ഓഹരികൾ

ഗെയിമിംഗ്, സ്‌പോർട്‌സ് മീഡിയ പ്ലാറ്റ്‌ഫോമായ നസാര ടെക്‌നോളജീസ് (ഓഹരി വില 516.75 രൂപ), തകർന്ന സിലിക്കൺ വാലി ബാങ്കിൽ തങ്ങളുടെ രണ്ട് സ്റ്റെപ്പ്-ഡൗൺ സബ്‌സിഡിയറികളുടെ ഏകദേശം 64 കോടി രൂപയുടെ ക്യാഷ് ബാലൻസ് ഉണ്ടെന്ന് ഞായറാഴ്ച പറഞ്ഞു. എന്നിരുന്നാലും, അനുബന്ധ സ്ഥാപനങ്ങളായ ഇവക്ക്‌ - കിഡോപിയ ഇങ്ക്, മീഡിയാവ്ക്സ് - നല്ല മൂലധന ശേഷി ഉണ്ടെന്നും അവ ലാഭത്തോടൊപ്പം നല്ല പണമൊഴുക്ക് സൃഷ്ടിക്കുന്നുണ്ടെന്നും കമ്പനി വ്യക്തമാക്കി.

വ്യക്തിഗത നിക്ഷേപകർക്കും എക്‌സ്‌ചേഞ്ച്-ട്രേഡഡ് ഫണ്ടുകൾക്കുമായി റിസർവ് ബാങ്ക് നിർബന്ധിതമാക്കിയ മൂന്ന് വർഷത്തെ ലോക്ക്-ഇൻ പിരീഡ് തിങ്കളാഴ്ച അവസാനിക്കുന്നതിനാൽ യെസ് ബാങ്കിന്റെ (ഓഹരി വില 16.50 രൂപ) ഓഹരികൾ വിൽപ്പന സമ്മർദ്ദം നേരിടാനിടയുണ്ടെന്ന് വിശകലന വിദഗ്ധർ പറയുന്നു.

സർക്കാർ ഉടമസ്ഥതയിലുള്ള ബാങ്ക് ഓഫ് മഹാരാഷ്ട്ര (ഓഹരി വില 26.80 രൂപ) ഭവന വായ്പകളുടെ പലിശ നിരക്ക് നിലവിലുള്ള 8.6 ശതമാനത്തിൽ നിന്ന് 8.4 ശതമാനമായി കുറച്ചതായി ഞായറാഴ്ച പ്രഖ്യാപിച്ചു. പുതിയ നിരക്ക് ഇന്ന് മുതൽ പ്രാബല്യത്തിൽ വരും.

ഹിന്ദുസ്ഥാൻ സിങ്കിലെ (ഓഹരി വില 304.40 രൂപ) ശേഷിക്കുന്ന 29.54 ശതമാനം സർക്കാർ ഓഹരികൾ വിറ്റഴിക്കാൻ സാധ്യതയുള്ളത് വേദാന്തയുടെ (ഓഹരി വില 279.85 രൂപ) ആഗോള സിങ്ക് ആസ്തികൾ പഴയ പൊതുമേഖലാ സ്ഥാപനത്തിന് വിൽക്കുന്നതിനെ കുറിച്ച് അന്തിമതീരുമാനത്തിലെത്തിയതിന് ശേഷമായിരിക്കും.

വാൾട്ട് ഡിസ്‌നി കമ്പനിയുമായുള്ള ലൈസൻസിംഗ് ഉടമ്പടിയിലൂടെ ഹോം ടെക്‌സ്‌റ്റൈൽസ് പ്രമുഖരായ വെൽസ്‌പൺ ഇന്ത്യ (ഓഹരി വില 69.10 രൂപ) കിഡ്‌സ് സെഗ്‌മെന്റിലെ അവസരങ്ങൾ പ്രയോജനപ്പെടുത്താൻ ശ്രമിക്കുന്നതായി വെൽസ്പൺ സിഇഒയും ജോയിന്റ് മാനേജിംഗ് ഡയറക്ടറുമായ ദിപാലി ഗോയങ്ക പറഞ്ഞു.

യുഎസ് ഡോളർ = 82.06 രൂപ (-0 പൈസ).

ബ്രെന്റ് ക്രൂഡോയില്‍ ഫ്യൂച്ചേഴ്‌സ് (ബാരലിന്) 81.11 ഡോളർ (-0.59%)

സ്വർണം 22 കാരറ്റ്, 1 ഗ്രാം (കൊച്ചി) = 5,215 രൂപ (0 രൂപ)

ബിറ്റ് കോയിൻ = 19,23,223 രൂപ.

ആറ് കറൻസികളുടെ ഗ്രുപ്പിനെതിരെ ഗ്രീൻബാക്കിന്റെ ശക്തി അളക്കുന്ന ഡോളർ സൂചിക 0.08 ശതമാനം താഴ്ന്ന് 105.22 ന് വ്യാപാരം നടക്കുന്നു.

ഐപിഒ

ഗ്ലോബൽ സർഫേസസ് ലിമിറ്റഡിന്റെ പ്രാഥമിക പബ്ലിക് ഓഫറിംഗ് ഇന്ന് (മാർച്ച് 13) സബ്‌സ്‌ക്രിപ്‌ഷനായി തുറക്കും, മാർച്ച് 15-നാണ് അവസാനിക്കുന്നത്. ഈ ഐപിഒയ്ക്ക് അപേക്ഷിക്കാൻ നിക്ഷേപകർക്ക് മൂന്ന് ദിവസത്തെ സമയമുണ്ട്. ഒരു ഷെയറിന് ₹133-140 പ്രൈസ് ബാൻഡ് നിശ്ചയിച്ചിട്ടുള്ള ഈ ഓഫറിൽ നിന്ന് ₹155 കോടി സമാഹരിക്കാനാണ് കമ്പനി ലക്ഷ്യമിടുന്നത്.