മാലദ്വീപ് നിറയെ ചൈനക്കാര്‍; ഇന്ത്യന്‍ യാത്രികര്‍ കുറഞ്ഞു
- ടൂറിസ്റ്റുകളുടെ എണ്ണത്തില്‍ ഇന്ത്യ അഞ്ചാമത്
- ഈവര്‍ഷം ചൈന ഒന്നാമതെത്തി
- മാലദ്വീപും ഇന്ത്യയും തമ്മിലുള്ള നയതന്ത്ര തര്‍ക്കമാണ് ദ്വീപില്‍ പ്രതിസന്ധി സൃഷ്ടിച്ചത്
മാലദ്വീപിലേക്ക് ചൈനീസ് വിനോദ സഞ്ചാരികളുടെ ഒഴുക്ക്. ദ്വീപസമൂഹം സന്ദര്‍ശിക്കുന്ന ചൈനാക്കാരുടെ എണ്ണം, ഇന്ത്യന്‍ വിനോദസഞ്ചാരികളെ മറികടന്നതായി ഔദ്യോഗിക കണക്കുകള്‍ വ്യക്തമാക്കുന്നു. മാലദ്വീപും ഇന്ത്യയും തമ്മിലുള്ള നയതന്ത്ര തര്‍ക്കത്തിനിടയിലാണ് ഈ വ്യതിയാനം.
ഫെബ്രുവരി 4 വരെ, ചൈനയില്‍നിന്ന് 23,972 വിനോദസഞ്ചാരികള്‍ സന്ദര്‍ശനത്തിനെത്തിയതായി മാലദ്വീപ് ടൂറിസം മന്ത്രാലയം പറയുന്നു. 11.2 ശതമാനത്തോടെ അവര്‍ വിപണി വിഹിതത്തില്‍ ഈവര്‍ഷം ഒന്നാം സ്ഥാനത്തെത്തി. 2023ല്‍ ചൈന മൂന്നാം സ്ഥാനത്തായിരുന്നു. കഴിഞ്ഞ വര്‍ഷം ഇന്ത്യയായിരുന്നു ഒന്നാം സ്ഥാനത്ത്. ഈ വര്‍ഷം 16,536 ഇന്ത്യന്‍ വിനോദ സഞ്ചാരികളാണ് മാലദ്വീപ് സന്ദര്‍ശിച്ചത്. നയതന്ത്ര തര്‍ക്കങ്ങള്‍ക്കുശേഷം ഇന്ത്യ 7.7 വിപണി വിഹിതവുമായി അഞ്ചാംസ്ഥാനത്തേക്കാണ് പിന്‍വലിഞ്ഞത്. ദ്വീപുകള്‍ സന്ദര്‍ശിക്കുന്ന ഇന്ത്യാക്കാരുടെ എണ്ണത്തില്‍ ഇനിയും കുറവുണ്ടാകാനാണ് സാധ്യത നിലനില്‍ക്കുന്നത്.
പ്രധാനമന്ത്രി നരേന്ദ്ര മോദിക്കെതിരായ മാലദ്വീപ് നേതാക്കളുടെ പരാമര്‍ശങ്ങള്‍ വൈറലായതിന് തൊട്ടുപിന്നാലെ, സെലിബ്രിറ്റികള്‍ ഉള്‍പ്പെടെ നൂറുകണക്കിന് സോഷ്യല്‍ മീഡിയ ഉപയോക്താക്കള്‍ മാലിദ്വീപിലെ ടൂറിസം ബഹിഷ്‌കരിക്കാനും പകരം ആഭ്യന്തര ലക്ഷ്യസ്ഥാനങ്ങള്‍ പര്യവേക്ഷണം ചെയ്യാനും ആഹ്വാനം ചെയ്തിരുന്നു. നയതന്ത്ര തര്‍ക്കത്തെ തുടര്‍ന്ന് ഇന്ത്യക്കാര്‍ മാലിദ്വീപിലേക്കുള്ള തങ്ങളുടെ ഷെഡ്യൂള്‍ ചെയ്ത യാത്ര റദ്ദാക്കുകയാണെന്ന് നിരവധി സോഷ്യല്‍ മീഡിയ ഉപയോക്താക്കളും ചില ട്രാവല്‍ കമ്പനികളും വെളിപ്പെടുത്തുകയും ചെയ്തു.
തുടര്‍ന്ന് ടൂറിസത്തെ ആശ്രയിച്ച് മുന്നോട്ടുപോകുന്ന മാലദ്വീപ് യാത്രക്കാരുടെ കുറവ് നികത്താന്‍ ചൈനയുടെ കാലുപിടിക്കേണ്ട അവസ്ഥയുണ്ടായി. ജനുവരിയില്‍ ബെയ്ജിംഗ് സന്ദര്‍ശന വേളയില്‍, പ്രസിഡന്റ് മുയിസു ചൈനീസ് പ്രസിഡന്റ് ഷി ജിന്‍പിംഗിനെയും പ്രീമിയര്‍ ലി ക്വിയാങ്ങിനെയും കാണുകയും ചൈനയില്‍ നിന്ന് തന്റെ ടൂറിസത്തെ ആശ്രയിക്കുന്ന രാജ്യത്തേക്ക് വിനോദസഞ്ചാരികളുടെ എണ്ണം വര്‍ധിപ്പിക്കുന്നതിനുള്ള വഴികള്‍ ചര്‍ച്ച ചെയ്യുകയും ചെയ്തു.
മാലിദ്വീപ് ഉള്‍പ്പെടെ 23 രാജ്യങ്ങളുമായി സമഗ്രമായ പരസ്പര വിസ സഹകരണ കരാര്‍ ഉണ്ടാക്കിയതായി ജനുവരി 31 ന് ചൈന പിന്നീട് അറിയിച്ചു.
നവംബര്‍ 17 ന് മാലിദ്വീപ് പ്രസിഡന്റായി സത്യപ്രതിജ്ഞ ചെയ്ത ഉടന്‍, ചൈന അനുകൂല നേതാവായി പരക്കെ കാണുന്ന മുയിസു, മാര്‍ച്ച് 15 നകം 88 സൈനികരെ തന്റെ രാജ്യത്ത് നിന്ന് പിന്‍വലിക്കാന്‍ ഇന്ത്യയോട് ഔദ്യോഗികമായി അഭ്യര്‍ത്ഥിച്ചതോടെയാണ് പ്രശ്‌നങ്ങളുടെ തുടക്കം.
ഇന്ത്യന്‍ സന്ദര്‍ശകരുടെ എണ്ണം 2022-ല്‍ 2.4 ലക്ഷത്തിലധികം ആയിരുന്നു, 2021-ല്‍ 2.11 ലക്ഷത്തിലധികം ഇന്ത്യക്കാര്‍ മാലദ്വീപിലേക്ക് പറന്നു. പകര്‍ച്ചവ്യാധിയുടെ സമയത്ത് അന്താരാഷ്ട്ര വിനോദസഞ്ചാരികള്‍ക്കായി തുറന്ന ചുരുക്കം ചില രാജ്യങ്ങളില്‍ ഒന്നാണ് മാലദ്വീപ്, ആ കാലയളവില്‍ ഏകദേശം 63,000 ഇന്ത്യക്കാര്‍ ആ രാജ്യം സന്ദര്‍ശിച്ചു.