3,500 കോടി രൂപ കടപ്പത്രവുമായി ടാറ്റ കണ്‍സ്യൂമര്‍ പ്രൊഡക്ട്സ്
- കാപ്പിറ്റല്‍ ഫുഡ്സ്, ഓര്‍ഗാനിക് ഇന്ത്യ എന്നിവയുടെ സമീപകാല ഏറ്റെടുക്കലുകള്‍ക്കായാണ് തുക
- കമ്പനിയുടെ ബോര്‍ഡ് വെള്ളിയാഴ്ച നടന്ന യോഗത്തിലാണ് അംഗീകാരം നല്‍കിയത്.
- ക്യാപിറ്റല്‍ ഫുഡ്സിനെ 5,100 കോടി രൂപയുടെ എന്റര്‍പ്രൈസ് മൂല്യത്തില്‍ ടിസിപിഎല്‍ ഏറ്റെടുക്കുന്നതായി കഴിഞ്ഞ ആഴ്ച പ്രഖ്യാപിച്ചിരുന്നു
ന്യൂഡല്‍ഹി: ടാറ്റ കണ്‍സ്യൂമര്‍ പ്രൊഡക്ട്സ് ലിമിറ്റഡ് (ടിസിപിഎല്‍) കാപ്പിറ്റല്‍ ഫുഡ്സ്, ഓര്‍ഗാനിക് ഇന്ത്യ എന്നിവയുടെ സമീപകാല ഏറ്റെടുക്കലുകള്‍ക്കായി 3,500 കോടി രൂപ കടം സമാഹരിക്കുമെന്ന് അറിയിച്ചു.
കമ്പനിയുടെ ബോര്‍ഡ് വെള്ളിയാഴ്ച നടന്ന യോഗത്തില്‍ 'കൊമേഴ്സ്യല്‍ പേപ്പറുകള്‍ ഇഷ്യൂ ചെയ്യുന്നതിലൂടെയും അനുവദിക്കുന്നതിലൂടെയും 3,500 കോടി രൂപയില്‍ കൂടാത്ത തുകയ്ക്ക് ഫണ്ട് സ്വരൂപിക്കുന്നതിന്' അംഗീകാരം നല്‍കി. രണ്ട് നിര്‍ദ്ദിഷ്ട ഏറ്റെടുക്കലുകളുടെ പേയ്മെന്റ് സുഗമമാക്കുന്നതിന് ബ്രിഡ്ജ് ഫണ്ടിംഗിനായി വിനിയോഗിക്കുമെന്ന് ടാറ്റ ഗ്രൂപ്പ് എഫ്എംസിജി വിഭാഗം ഒരു റെഗുലേറ്ററി ഫയലിംഗില്‍ പറഞ്ഞു.
ചിംഗ്‌സ് സീക്രട്ട്, സ്മിത്ത് & ജോണ്‍സ് തുടങ്ങിയ ബ്രാന്‍ഡുകളുടെ ഉടമസ്ഥതയിലുള്ള ക്യാപിറ്റല്‍ ഫുഡ്സിനെ 5,100 കോടി രൂപയുടെ എന്റര്‍പ്രൈസ് മൂല്യത്തില്‍ ടിസിപിഎല്‍ ഏറ്റെടുക്കുന്നതായി കഴിഞ്ഞ ആഴ്ച പ്രഖ്യാപിച്ചിരുന്നു. 1,900 കോടി രൂപയ്ക്കാണ് ഇടപാട്. ഹെല്‍ത്ത് ആന്‍ഡ് വെല്‍നസ് വിഭാഗത്തില്‍ പ്രവര്‍ത്തിക്കുന്ന ഓര്‍ഗാനിക് ഇന്ത്യയെ 1,900 കോടി രൂപയുടെ എന്റര്‍പ്രൈസ് മൂല്യത്തില്‍ ടിസിപിഎല്‍ ഏറ്റെടുക്കും.
ടാറ്റ കണ്‍സ്യൂമര്‍ പ്രോഡക്ട്സ് അടുത്തിടെ പ്രഖ്യാപിച്ച ഇടപാടുകള്‍ക്കായി വാണിജ്യ പേപ്പര്‍ വഴി 3,500 കോടി രൂപ വരെ ബ്രിഡ്ജ് ഫിനാന്‍സിംഗ് സമാഹരിക്കും. 3,000 കോടി രൂപ വരെയുള്ള റൈറ്റ്‌സ് ഇഷ്യൂ (ഇക്വിറ്റി) സംയോജിപ്പിച്ച് ഈ ബ്രിഡ്ജ് തിരികെ നല്‍കുമെന്ന് ടിസിപിഎല്‍ പുറത്തിറക്കിയ പ്രസ്താവനയില്‍ പറഞ്ഞു.
റെക്കോര്‍ഡ് തീയതി പ്രകാരം കമ്പനിയുടെ യോഗ്യരായ ഇക്വിറ്റി ഷെയര്‍ഹോള്‍ഡര്‍മാര്‍ക്ക് 3,000 കോടി രൂപയില്‍ കവിയാത്ത തുകയ്ക്ക് റൈറ്റ്‌സ് ഇഷ്യു വഴി കമ്പനിയുടെ 1 രൂപ വീതം മുഖവിലയുള്ള ഇക്വിറ്റി ഷെയറുകള്‍ ഇഷ്യു വഴി ഫണ്ട് സമാഹരണത്തിനും ബോര്‍ഡ് അംഗീകാരം നല്‍കി.