തെര്‍മല്‍ പവര്‍ പ്ലാന്റുകള്‍ക്ക് ഇലക്ട്രോണിക്സ് സംവിധാനങ്ങള്‍ നിര്‍മ്മിച്ചു നല്‍കി കെല്‍ട്രോണ്‍
- യദാദ്രി താപവൈദ്യുത നിലയത്തിന്റെ ഓര്‍ഡര്‍ 90 ശതമാനത്തോളം പൂര്‍ത്തീകരിച്ചു
;
ഭാരത് ഹെവി ഇലക്ട്രിക്കല്‍സിന്റെയും നെയ്വേലി ലിഗ്നൈറ്റ് കോര്‍പ്പറേഷന്റെയും താപവൈദ്യുത നിലയങ്ങളില്‍ വിവിധ ഇലക്ട്രോണിക്സ് സംവിധാനങ്ങള്‍ നിര്‍മ്മിച്ചു നല്‍കി കെല്‍ട്രോണ്‍ വീണ്ടും മാതൃകയെന്ന് വ്യവസായ മന്ത്രി പി രാജീവ്. കൂടാതെ കഴിഞ്ഞ വര്‍ഷം കെല്‍ട്രോണിന് ലഭിച്ച യദാദ്രി താപവൈദ്യുത നിലയത്തിന്റെ ഓര്‍ഡര്‍ 90 ശതമാനത്തോളം പൂര്‍ത്തീകരിച്ചതായി മന്ത്രി ഫേസ്ബുക്കിലൂടെ അറിയിച്ചു.
താപവൈദ്യുത നിലയങ്ങളിലെ ഫര്‍ണ്ണസ്, ബോയിലര്‍ എന്നിവയുടെ പ്രവര്‍ത്തനത്തിനാവശ്യമായ വായു മര്‍ദ്ദത്തിന്റെ തോത് നിയന്ത്രിക്കുന്ന ന്യൂമാറ്റിക് ആക്യുവേറ്ററുകൾ നിര്‍മ്മിച്ചുനല്‍കുന്നതിനായി ഭെല്ലിന്റെ തമിഴ്നാട്ടിലുള്ള ഉത്തങ്കുടി, ആന്ധ്രാപ്രദേശിലുള്ള യദാദ്രി താപവൈദ്യുത നിലയങ്ങളില്‍ നിന്ന് 2.5 കോടി രൂപയുടെ ഓര്‍ഡറുകള്‍ കഴിഞ്ഞ സാമ്പത്തിക വര്‍ഷം കെല്‍ട്രോണിന് ലഭിച്ചിരുന്നു. 150 ന്യൂമാറ്റിക് ആക്യുവേറ്റർ അനുബന്ധ സംവിധാനങ്ങളും നിര്‍മ്മിച്ചു നല്‍കുന്നതിനായിരുന്നു ഓര്‍ഡര്‍. ഇതില്‍ ഉത്തങ്കുടി താപവൈദ്യുത നിലയത്തിനുള്ള ഓര്‍ഡര്‍ കെല്‍ട്രോണ്‍ പൂര്‍ണമായും നല്‍കിക്കഴിഞ്ഞു.
ന്യൂമാറ്റിക് ആക്ചുവേറ്ററുകള്‍ നിര്‍മ്മിച്ചു നല്‍കുന്നതിനായി അന്തര്‍ദേശീയ തലത്തില്‍ നിന്നും ഓര്‍ഡറുകള്‍ കെല്‍ട്രോണിന് ലഭിക്കുന്നുണ്ട്. കണ്‍ട്രോള്‍ ആന്‍ഡ് ഇന്‍സ്ട്രമെന്റേഷന്‍ സംവിധാനങ്ങള്‍ സ്ഥാപിക്കുന്നതുമായി ബന്ധപ്പെട്ട് നെയ്വേലി ലിഗ്നൈറ്റ് കോര്‍പറേഷന്റെ ഓര്‍ഡര്‍ കെല്‍ട്രോണിന് ലഭിച്ചിരുന്നു. താപവൈദ്യുത നിലയത്തിന്റെ ഭാഗമായി പ്രവര്‍ത്തിക്കുന്ന ലിഗ്നൈറ്റ് ഹാന്‍ഡ്ലിംഗ് ആന്‍ഡ് സ്റ്റോറേജ് സിസ്റ്റത്തിന് വേണ്ടിയുള്ള പ്ലാന്റിന്റെ പ്രോഗ്രാമബിള്‍ ലോജിക് കണ്‍ട്രോളര്‍ സംവിധാനം നവീകരിക്കുന്നതിനുള്ള പ്രവര്‍ത്തനമാണ് കെല്‍ട്രോണ്‍ കണ്‍ട്രോള്‍സ് എറ്റെടുത്ത് പൂര്‍ത്തിയാക്കിയിരിക്കുന്നത്. ഇതിലേക്കായി നിര്‍മ്മിച്ച ഇന്‍സ്ട്രുമെന്റേഷന്‍ പാനലുകള്‍ ഈ മാസം എട്ടിന് തമിഴ്‌നാട്ടിലെ നെയ്വേലി പവര്‍ പ്ലാന്റിലെത്തിച്ചു.
ഇന്ത്യയിലെ വിവിധ വ്യവസായ സ്ഥാപനങ്ങള്‍ക്ക് വേണ്ടി കണ്‍ട്രോള്‍ ആന്‍ഡ് ഇന്‍സ്ട്രുമെന്റേഷന്‍ സംവിധാനങ്ങള്‍ നിര്‍മ്മിക്കുന്ന കെല്‍ട്രോണ്‍ കണ്‍ട്രോള്‍സ് കൂടുതല്‍ ഓര്‍ഡറുകള്‍ നേടിയെടുത്ത് ഈ വര്‍ഷവും മുന്നേറ്റം സൃഷ്ടിക്കാനുള്ള ശ്രമം തുടരുകയാണെന്നും മന്ത്രി പറഞ്ഞു.
