വിപണിയിൽ ബുൾ റൺ, കേരളത്തിന് പുതിയ ശതകോടീശ്വരന്മാർ

റെക്കോർഡ് ഉയരങ്ങളിലേക്ക് കുതിച്ച ഇന്ത്യൻ ഓഹരി വിപണി കേരളത്തിൽ പുതിയ ശത കോടീശ്വരന്മാർക്ക് ജന്മം നൽകി. വിപണിയിലെ ബുൾ റണ്ണിനെ തുടർന്ന് കല്യാണരാമൻ ടി എസ് , ഇസാഫ് സ്ഥാപകൻ കെ പോൾ തോമസ്, മുത്തൂറ്റ് മൈക്രോഫിന്റെ മൂന്ന് പ്രൊമോട്ടർമാർ, വണ്ടർല ഉടമകളായ ചിറ്റിലപ്പിള്ളി കുടുംബം, മണപ്പുറം ഫിനാൻസ് ഉടമ വി പി നന്ദകുമാർ തുടങ്ങിയവരുടെ സമ്പത്തിലാണ് ഗണ്യമായ വർദ്ധന ഉണ്ടായിരിക്കുന്നത്.

2021 ന് ശേഷമുള്ള സൂചികകളുടെ ഏറ്റവും മികച്ച പ്രകടനമാണ് കഴിഞ്ഞ ഏതാനും നാളുകളായി വിപണിയിൽ ദൃശ്യമായത്. നിഫ്റ്റി 2023 ൽ 20% ഉയർന്നപ്പോൾ, ബിഎസ്ഇ സെൻസെക്സ് 19% റിട്ടേൺ നൽകി. റെക്കോർഡ് ഉയരങ്ങളിലേക്ക് കുതിച്ച ഇന്ത്യൻ ഓഹരി വിപണി കേരളത്തിൽ നിന്ന് പുതിയ ശതകോടീശ്വരന്മാരെ സൃഷ്ടിച്ചു. അടുത്തിടെ നടന്ന ബുൾ റണ്ണിന്റെ ഏറ്റവും വലിയ സംസ്ഥാന ഗുണഭോക്താക്കൾ കല്യാൺ ജ്വല്ലേഴ്‌സ് പ്രൊമോട്ടർമാരായ കല്യാണരാമൻ ടി എസും അദ്ദേഹത്തിന്റെ മക്കളായ ടി കെ സീതാറാമും ടി കെ രമേശുമാണ്. കഴിഞ്ഞ 12 മാസത്തിനിടെ കമ്പനിയുടെ ഓഹരി 180 ശതമാനം ഉയർന്ന് 126.45 രൂപയിൽ നിന്ന് 354.45 രൂപയായി.

കല്യാണരാമന്റെ ജ്വല്ലറിയിലെ 20.94% ഓഹരി ഡിസംബർ 29 ന് വ്യാപാരം അവസാനിക്കുമ്പോൾ 7,645.10 കോടി രൂപയായിരുന്നു. ഒരു വർഷം മുമ്പ് ഇത് 2,7,27.39 കോടി രൂപയായിരുന്നു. അതുപോലെ, അദ്ദേഹത്തിന്റെ രണ്ട് മക്കളുടെയും 18.06% ഓഹരിയുടെ മൂല്യം ഇതേ കാലയളവിൽ 2,352.78 കോടി രൂപയിൽ നിന്ന് 6,595.04 കോടി രൂപയായി ഉയർന്നു.

ഇസാഫ് സ്മോൾ ഫിനാൻസ് ബാങ്കിന്റെയും മുത്തൂറ്റ് മൈക്രോഫിൻ ലിമിറ്റഡിന്റെയും വിപണി അരങ്ങേറ്റം സംസ്ഥാനത്തിന് പുതിയ കോടീശ്വരന്മാരെ സംഭാവന ചെയ്തു. ഇസാഫ് സ്ഥാപകൻ കെ പോൾ തോമസിന്റെ തൃശൂർ ആസ്ഥാനമായ സ്‌മോൾ ഫിനാൻസ് ബാങ്കിലെ 6.06 ശതമാനം ഓഹരിയുടെ മൂല്യം ഇപ്പോൾ 215 കോടി രൂപയാണ്.

ബാങ്കിലെ ഇസാഫ് ഫിനാൻഷ്യൽ ഹോൾഡിംഗ്‌സ് (52.94% ഓഹരി), ഇഎസ്‌എഎഫ് സ്വാശ്രയ മൾട്ടി സ്റ്റേറ്റ് അഗ്രോ-കോ-ഓപ്പറേറ്റീവ് സൊസൈറ്റി (4.35%) എന്നിവയുടെ ഓഹരികൾ കണക്കിലെടുക്കുകയാണെങ്കിൽ, പ്രൊമോട്ടർ ഗ്രൂപ്പിന്റെ ഓഹരി മൂല്യം 2,243.76 കോടി രൂപയാകും.

മുത്തൂറ്റ് ഫിൻകോർപ്പിന്റെ (മുത്തൂറ്റ് പാപ്പച്ചൻ ഗ്രൂപ്പ്) മൈക്രോ ഫിനാൻസ് വിഭാഗമായ മുത്തൂറ്റ് മൈക്രോഫിന്നിൽ പ്രൊമോട്ടർമാരായ തോമസ് ജോൺ മുത്തൂറ്റ്, തോമസ് ജോർജ് മുത്തൂറ്റ്, തോമസ് മുത്തൂറ്റ് എന്നിവർക്ക് 1.75% വീതം ഓഹരിയുണ്ട്. അതിൻറെ മൂല്യം ഇപ്പോൾ 74.92 കോടി രൂപയാണ്. കുടുംബത്തിന് ആകെ 5.26% ഓഹരി വിഹിതമുണ്ട്. ഇതിൻറെ മൂല്യം ഏകദേശം 225.32 കോടി രൂപയാണ്.

സ്റ്റോക്ക് പ്രകടനത്തിന്റെ കാര്യത്തിൽ, വണ്ടർല ഹോൾഡിംഗ്‌സും 2023ൽ 146.38% നേട്ടം കൈവരിച്ചു. ഇത് പ്രമോട്ടർമാരായ ചിറ്റിലപ്പിള്ളി കുടുംബത്തിന്റെ മൂല്യം ഉയർത്തി. മാനേജിംഗ് ഡയറക്ടർ അരുൺ കെ ചിറ്റിലപ്പിള്ളിയുടെ 35.73% ഹോൾഡിംഗിന്റെ മൂല്യം വെള്ളിയാഴ്ച 1,702.44 കോടി രൂപയായി ഉയർന്നു. മുൻ വർഷം ഇത് 690.96 കോടി രൂപയായിരുന്നു. വണ്ടർല സ്റ്റോക്ക് വെള്ളിയാഴ്ച വ്യാപാരം അവസാനിപ്പിച്ചത് 842.15 രൂപയിലാണ്. 2022 ലെ അവസാന വ്യാപാര ദിനത്തിൽ 341.8 രൂപയായിരുന്നു ഇതിന്റെ വില.

കൊച്ചി ആസ്ഥാനമായുള്ള ജിയോജിത് ഫിനാൻഷ്യൽ സർവീസസും നേട്ടമുണ്ടാക്കി. ഒരു വർഷത്തെ കാലയളവിൽ അതിന്റെ ഓഹരി വില 47.35 രൂപയിൽ നിന്ന് 78.29 രൂപയായി ഉയർന്നു. അതിന്റെ സ്ഥാപകനായ സി ജെ ജോർജിന്റെ 18.12% ഓഹരിയുടെ മൂല്യം 205.69 കോടി രൂപയിൽ നിന്ന് 339 കോടി രൂപയായി ഉയർന്നു.

മണപ്പുറം ഫിനാൻസിൽ വി പി നന്ദകുമാറിന്റെ ഓഹരി 2,847 കോടിയിൽ നിന്ന് 4,220 കോടിയായി ഉയർന്നു. ഗോൾഡ് ഫിനാൻസ് കമ്പനിയിൽ അദ്ദേഹത്തിന് 29% ഓഹരിയുണ്ട്.

മുത്തൂറ്റ് ഫിനാൻസ് പ്രൊമോട്ടർമാരായ ജോർജ്ജ് ജേക്കബ് മുത്തൂറ്റ്, ജോർജ്ജ് തോമസ് മുത്തൂറ്റ് (ഓരോരുത്തർക്കും 10.87% ഓഹരി), ജോർജ്ജ് അലക്‌സാണ്ടർ മുത്തൂറ്റ് (5.89% ഓഹരി) എന്നിവർ നേട്ടമുണ്ടാക്കിയവരിൽ ഉൾപ്പെടുന്നു. ജോർജ്ജ് ജേക്കബിന്റെയും ജോർജ്ജ് തോമസിന്റെയും ഓഹരി 4,639.9 കോടി രൂപയിൽ നിന്ന് 6,445.8 കോടി രൂപയായി ഉയർന്നപ്പോൾ ജോർജ്ജ് അലക്സാണ്ടറിന്റെ കൈവശമുള്ള മൂല്യം 2,513.02 കോടി രൂപയിൽ നിന്ന് 3,491.11 കോടി രൂപയായി ഉയർന്നു.