കൊക്കകോളയക്ക് ഗുജറാത്തിൽ 3,000 കോടിയുടെ പുതിയ നിക്ഷേപ൦
- തൊഴിലവസരങ്ങള്‍ ഉയര്‍ത്തും
- ഗുജറാത്തില്‍ ഏകദേശം 285 വിതരണക്കാരും 224,000-ലധികം റീട്ടെയിലര്‍മാരും എച്ച്‌സിസിബിക്കുണ്ട്
ഇന്ത്യയിലെ കൊക്കകോളയുടെ ബോട്ടിലിംഗ് വിഭാഗമായ ഹിന്ദുസ്ഥാന്‍ കൊക്കകോള ബിവറേജസ് (എച്ച്‌സിസിബി) 3,000 കോടിയുടെ ഒരു പ്ലാന്റ് രാജ്‌കോട്ടിൽ സ്ഥാപിക്കാൻ ഗുജറാത്ത് സര്‍ക്കാരുമായ കരാര്‍ ഒപ്പിട്ടു. 2026-ല്‍ പ്രവര്‍ത്തനം ആരംഭിക്കുന്ന ഈ പ്ലാന്റിൽ ജ്യൂസ്, എയറേറ്റഡ് പാനീയങ്ങള്‍ എന്നിവയ്ക്കായി അത്യാധുനിക സൗകര്യങ്ങളായിരിക്കും ഒരുക്കുക..
നിലവിൽ സംസ്ഥാനത്തെ ഗോബ്ലെജിലും സാനന്ദിലു൦ എച്ച്സിസിബിക്കു പ്ലാന്റുകളുണ്ട്.
പുതിയ യൂണിറ്റിന്റെ പ്രവർത്തനം ആരംഭിക്കുമ്പോൾ എ ച്ച്സിസിബിയുടെ സംസ്ഥാനത്തെ തൊഴിലാളികളുടെ എണ്ണം 1500 ആയി ഉയരും. ഗുജറാത്തില്‍ ഏകദേശം 285 വിതരണക്കാരും 224,000-ലധികം റീട്ടെയിലര്‍മാരുമുള്ളതാണ് എച്ച്സിസിബിയുടെ ശൃംഖല.
''ഇത് ഞങ്ങളുടെ ബിസിനസ്സ് പ്രവര്‍ത്തനങ്ങളെ അളക്കുക മാത്രമല്ല, ഒരു പ്രധാന വിപണിയായ ഒരു സംസ്ഥാനത്ത് ഞങ്ങളുടെ വേരുകള്‍ ആഴത്തിലാക്കുക കൂടിയാണ്. പ്രാദേശിക വികസനത്തിന് ഉത്തേജകമായി ഈ പദ്ധതിയെ ഞങ്ങള്‍ മുന്‍കൂട്ടി കാണുന്നു. പ്രാദേശിക പ്രതിഭകള്‍ക്ക് പുതിയ അവസരങ്ങള്‍ കൊണ്ടുവരികയും ഗുജറാത്തിന്റെ സാമ്പത്തികവും സാമൂഹികവുമായ പുരോഗതിയോടുള്ള ഞങ്ങളുടെ പ്രതിബദ്ധത ശക്തിപ്പെടുത്തുകയും ചെയ്യുന്നു, '' എച്ച്‌സിസിബിയിലെ ചീഫ് പബ്ലിക് അഫയേഴ്‌സ്, കമ്മ്യൂണിക്കേഷന്‍സ് ആന്‍ഡ് സസ്‌റ്റൈനബിലിറ്റി ഓഫീസര്‍ ഹിമാന്‍ഷു പ്രിയദര്‍ശി പറഞ്ഞു.
ഈ മേഖലയില്‍ ഗണ്യമായ സാമ്പത്തികവും സാമൂഹികവുമായ വികസനം പ്രോത്സാഹിപ്പിക്കുന്നതിനും വ്യാവസായിക സാന്നിധ്യം സ്ഥാപിക്കുന്നതിനും ഈ നിക്ഷേപം സഹായിക്കുമെന്ന് പ്രതീക്ഷിക്കുന്നു.
നയങ്ങളും ചട്ടങ്ങളും അനുസരിച്ച് എല്ലാ അവശ്യ അനുമതികളും രജിസ്‌ട്രേഷനുകളും അംഗീകാരങ്ങളും ക്ലിയറന്‍സുകളും ഉടനടി നേടിയെടുക്കുന്നതിന് എച്ച്‌സിസിബിയെ സഹായിക്കുന്നതിന് ഗുജറാത്ത് സര്‍ക്കാര്‍ പൂര്‍ണ്ണ പിന്തുണ വാഗ്ദാനം ചെയ്തിട്ടുണ്ട്.
ബിസിനസ് ഇന്റലിജന്‍സ് പ്ലാറ്റ്ഫോമായ ടോഫ്ളറില്‍ നിന്ന് ലഭിച്ച വിവരമനുസരിച്ച്, കമ്പനിയുടെ അറ്റാദായത്തില്‍ ഇരട്ടി വര്‍ധനവ് ഉണ്ടായി. 2022-2023 സാമ്പത്തിക വര്‍ഷത്തില്‍ ഇത് 809.32 കോടി രൂപയിലെത്തി. ഇന്ത്യയിലുടനീളമുള്ള 16 ഫാക്ടറികള്‍ കൈകാര്യം ചെയ്യുന്ന കമ്പനി, അതിന്റെ പ്രവര്‍ത്തന വരുമാനത്തില്‍ 41.51 ശതമാനം വളര്‍ച്ച രേഖപ്പെടുത്തി.