ഡോളര്‍ വില റെക്കോഡിനടുത്ത്: രൂപ 57 പൈസ ഇടിഞ്ഞ് 76.92ല്‍

ഡെല്‍ഹി : ഡോളറിനെതിരെ രൂപയുടെ മൂല്യം 57 പൈസ ഇടിഞ്ഞ് 76.92ല്‍ എത്തി. വിദേശ മാര്‍ക്കറ്റില്‍ ഡോളര്‍ ശക്തിപ്പെട്ടതും ക്രൂഡ് വില ഉയര്‍ന്ന് നിന്നതുമാണ് രൂപയ്ക്ക് തിരിച്ചടിയായത്. ഇന്റര്‍ബാങ്ക് ഫോറക്സ് വിപണിയില്‍ ഡോളറിനെതിരെ 76.61 എന്ന നിലയിലാണ് ഇന്ന് വ്യാപാരം ആരംഭിച്ചത്. വ്യാപാരത്തിനിടെ ഒരു ഘട്ടത്തില്‍ രൂപയുടെ മൂല്യം 76.56 എന്ന നിലയിലേക്ക് ഉയര്‍ന്നിരുന്നു. വ്യാപാരം അവസാനിച്ചപ്പോള്‍ രൂപയുടെ മൂല്യം മുന്‍ സെഷനേക്കാള്‍ 57 പൈസ ഇടിഞ്ഞ് 76.92ല്‍ എത്തി. 2021-22 സാമ്പത്തിക വര്‍ഷത്തില്‍ ഡോളറിനെതിരെ രൂപയുടെ മൂല്യം 264 പൈസയാണ് (3.61 %) ഇടിഞ്ഞത്.

വ്യാഴാഴ്ച്ച ഡോളറിനെതിരെ രൂപയുടെ മൂല്യം 16 പൈസ ഉയര്‍ന്ന് 76.24ല്‍ എത്തിയിരുന്നു. ആര്‍ബിഐ റിപ്പോ നിരക്ക് വര്‍ധിപ്പിച്ചതിന് പിന്നാലെയാണ് വ്യാഴാഴ്ച്ച രൂപയുടെ മൂല്യവും ഉയര്‍ന്നത്. ഇന്ന് സെന്‍സെക്സ് 866.65 പോയിന്റ് (1.56 ശതമാനം) ഇടിഞ്ഞ് 54,835.58ല്‍ വ്യാപാരം അവസാനിപ്പിച്ചു. എന്‍എസ്ഇ നിഫ്റ്റി 271.40 പോയിന്റ് (1.63 ശതമാനം) ഇടിഞ്ഞ് 16,411.25ല്‍ വ്യാപാരം അവസാനിപ്പിച്ചു. അന്താരാഷ്ട്ര ബ്രെന്റ് ക്രൂഡ് വില ബാരലിന് 113.46 ഡോളറായി. ഓഹരി വിപണിയില്‍ നിന്നുള്ള റിപ്പോര്‍ട്ട് പ്രകാരം വിദേശ നിക്ഷേപകര്‍ 2,074.74 കോടി രൂപയാണ് വിപണിയില്‍ നിന്നും വ്യാഴാഴ്ച്ച പിന്‍വലിച്ചത്.