എയർ ഫ്രാൻസ്-കെഎൽഎം ഇന്ത്യയിലേക്കുള്ള സർവ്വീസ് 30 ആയി ഉയർത്തും

ഡെൽഹി: എയർ ഫ്രാൻസ്-കെഎൽഎം ഗ്രൂപ്പ് ഇന്ത്യയിലേക്കുള്ള വിമാനങ്ങൾ ആഴ്ചയിൽ 20 ൽ നിന്നും മെയ് മാസത്തിൽ 30 ആയി ഉയർത്തുമെന്ന് അറിയിച്ചു. പാൻഡെമികിന് ശേഷം ഏകദേശം രണ്ട് വർഷത്തെ ഇടവേളയ്ക്ക് ശേഷമാണ് പതിവ് അന്താരാഷ്ട്ര വിമാനങ്ങൾ ഞായറാഴ്ച പുനരാരംഭിച്ചത്.

കഴിഞ്ഞ രണ്ട് വർഷങ്ങളായി രാജ്യങ്ങൾ തമ്മിലുള്ള ഉഭയകക്ഷി എയർ ബബിൾ ക്രമീകരണങ്ങൾക്ക് കീഴിൽ ഇന്ത്യ, ഫ്രാൻസ്, നെതർലാൻഡ് ഉൾപ്പെടെ തിരഞ്ഞെടുത്ത രാജ്യങ്ങൾക്കിടയിൽ പരിമിതമായ അന്താരാഷ്ട്ര യാത്രാ വിമാനങ്ങൾ മാത്രമെ സർവീസ് നടത്തിയിരുന്നുള്ളൂ.

“യാത്ര പുനരാരംഭിച്ചതിന് ശേഷം, എയർ ഫ്രാൻസും കെ‌എൽ‌എമ്മും ഇന്ത്യയിൽ നിന്നുള്ള ഫ്ലൈറ്റ് പ്രവർത്തനങ്ങൾ ക്രമാനുഗതമായി വർദ്ധിപ്പിക്കും. ഏപ്രിലിൽ 20 പ്രതിവാര ഫ്ലൈറ്റുകൾ ആരംഭിക്കുകയും, മെയ് മാസത്തിൽ ഇത് 30 പ്രതിവാര യാത്രകളായി വർദ്ധിപ്പിക്കുകയും ചെയ്യും,” ഗ്രൂപ്പ് പത്രക്കുറിപ്പിൽ അറിയിച്ചു.

ബെംഗളൂരു, ചെന്നൈ, ഡൽഹി, മുംബൈ എന്നീ നാല് ഗേറ്റ്‌വേകളിൽ നിന്നും എയർ ഫ്രാൻസ് സർവീസ് നടത്തുമെന്നും, കെഎൽഎം ഡൽഹി, മുംബൈ എന്നിവിടങ്ങളിൽ നിന്നും സർവീസ് നടത്തുമെന്നും കമ്പനി അറിയിച്ചു.